Bremen (Duits: [ˈbʀeːmən], luister (hulp·inligting); Nederduits ook Breem of Bräm; Nedersaksies: Breemn) is die hoofstad en grootste stad van die Duitse deelstaat Vrye Hansestad Bremen, wat dikwels ook net "Bremen" genoem word. As die kleinste deelstaat van Duitsland behels die stadstaat naas Bremen slegs een ander stad, Bremerhaven, wat as Noordseehawe sowat 60 kilometer verder noord geleë is.

Bremen is met 'n bevolking van 567 400 die tweede grootste stad in Noord-Duitsland na Hamburg en die elfde grootste in Duitsland. Die stad is die setel van die Breemse parlement (Duits: Bremer Bürgerschaft), die regering van die deelstaat (Senaat van Bremen, Duits: Bremer Senat) en van die meeste instellings en geregshowe van die deelstaat.

In die vroeë Middeleeue het Bremen 'n belangrike rol by die Christelike sendingwerk in Noord- en Noordoos-Europa gespeel en was ook die biskopsetel vir Noord-Europa. As een van die magtige seehandelstede van die Hansebond het Bremen in die 13de eeu tot een van die eerste republikeinse stadstate in Europa ontwikkel wat deur welvarende koopmansgesinne oorheers is. Ná die einde van die Tweede Wêreldoorlog is Bremen deur Amerikaanse troepe beset en het later een van drie stadstate in die Duitse Bondsrepubliek geword.

Alhoewel die oop see sowat een uur per motor van Bremen af lê, is die getye op die Weserrivier twee keer per dag duidelik waarneembaar. Die promenade langs die Weser was vroeër die middelpunt van Bremen se besige seehawe, en plaaslike koopmanne het handel met alle bekende gebiede gedryf. Vandag word seevrag veral in die Neustädter Hafen en Bremen se moderne susterstad Bremerhaven met hul uitgebreide houerterminale gehanteer. Die seehawe is die tweede belangrikste invoerhawe vir motors in Europa en hanteer jaarliks sowat 1,4 miljoen voertuie. Tans is Daimler AG (vroeër DaimlerChrysler AG) die grootste privaat werkgewer, terwyl Airbus in Bremen met 3 100 werknemers oor die tweede grootste werksterrein in Duitsland na Hamburg beskik.

Bremen het na die agteruitgang van sy tradisionele skeepsbou en die verskuiwing van hawegeriewe tot 'n moderne kulturele, wetenskaplike en hoëtegnologiesentrum ontwikkel. Bremen het daarnaas ondanks die grootskaalse oorlogskade van die jare 1940 tot 1945 'n ryke argitektoniese erfenis van verskillende tydperke bewaar, waaronder 'n historiese stadskern met winkellane en 'n groot aantal museums en ander kulturele instellings wat van die stad 'n gewilde toeristebestemming maak. Die stad bestaan vandag uit 'n historiese stadskern en uitgebreide voorstede wat meestal hul eie spesifieke, soms selfs landelike karakter bewaar het.

...lees verder

• Die Suid-Afrikaanse molekulêre bioloog en Nobelpryswenner, Sydney Brenner, sterf op 92 in Singapoer.


• Suid-Afrika se Bafana-Bafana kwalifiseer vir die Afrikanasiesbeker in Junie en Julie in Egipte, nadat hulle Libië in die laaste kwalifiserende wedstryd met 2–1 klop.


• 
  Koerdiese troepe verower Al-Baghuz Fawqani in Sirië, die laaste nedersetting wat deur die terroristegroep "Islamitiese Staat" beset was.


• Die Britse regering en die Europese Raad kom ooreen om die vir 29 Maart 2019 beplande Brexit om minstens twee weke te verskuif.


• Die Amerikaanse regering onder President Donald Trump erken die deur Israel geannekseerde Golanhoogland as deel van dié land, ten spyte van die internasionale erkenning as integrale deel van Sirië.

... Samuel Morse, die uitvinder van die telegraaf, vir burgemeester van New York gestaan het? Hy was egter nie suksesvol nie.

... dat die Kaap Agulhasvuurtoring by Kaap Agulhas wat op 1 Maart 1849 in gebruik geneem is, gebou is volgens die model van die Pharos van Alexandrië, een van die Sewe wonders van die antieke wêreld.

6 April

• 
  1320 – Die Skotte herbevestig hul onafhanklikheid deur die ondertekening van die Verklaring van Arbroath.


• 
  1652 – Die Nederlandse seevaarder Jan van Riebeeck sit vir die eerste keer voet aan wal in die Kaap die Goeie Hoop, waar hy 'n handelspos stig.


• 
  1917 – Eerste Wêreldoorlog: Die Verenigde State verklaar oorlog teen die Duitse Keiserryk.


• 
  1941 – Tweede Wêreldoorlog: Nazi-Duitsland val Joego-Slawië en Griekeland binne.


• 
  1994 – Die Rwandese volksmoord begin toe die vliegtuig waarin die president van Rwanda, Juvénal Habyarimana, en die president van Burundi, Cyprien Ntaryamira, deur ekstremiste met vuurpyle afgeskiet word.